Þingmaður Vinstri grænna: Ríkisstjórn VG, Pírata og Sjálfstæðisflokks spennandi kostur

Þingmaður Vinstri grænna segir að það gæti verið spennandi kostur að reyna myndun ríkisstjórnar með Sjálfstæðisflokki og Pírötum. Þingmaður Sjálfstæðisflokksins segir augljóst að skoða þurfi myndun ríkisstjórnar með Vinstri grænum ef aðrir möguleikar eru ekki í stöðunni.

Engin formleg tilboð um stjórnarmyndunarviðræður hafa komið fram síðan Katrín Jakobsdóttir, formaður Vinstri grænna, skilaði umboði sínu til stjórnarmyndunar. Forystufólk flokkanna var sammála um að gærdagurinn hefði verið rólegur en Guðni Th. Jóhannesson, forseti Íslands, sagði á Bessastöðum fyrir helgi að hann vænti þess að um helgina eða í byrjun næstu viku í síðasta lagi hafi línur skýrst og unnt verði að ákveða næstu skref í viðræðunum.

Skynsamlegast að þing komi saman

Bjarkey Olsen Gunnarsdóttir, þingmaður Vinstri grænna, segir alla flokka vera að ræða saman.„Þó að fólk hafi haft hægt um sig í gær að þá auðvitað áttu sér stað samtöl og allt slíkt en óformlegt með öllu. En ég auðvitað tel og hef sagt það að það væri skynsamlegast að þingið komi saman og fari að vinna við fjárlög. Skipað verði í nefndir til bráðabirgða burtséð frá því hvort það verði búið að mynda ríkisstjórn hér eftir helgina. Mér finnst óþarfi að bíða til 6. desember,” segir Bjarkey. Það gæti orðið til þess að hraða myndun nýrrar ríkisstjórnar að kalla saman Alþingi.

Vilji er til þess innan Pírata og Samfylkingar að hefja aftur viðræður um myndun fimm flokka ríkisstjórnar með Vinstri grænum, Bjartri framtíð og Viðreisn. Bjarkey segir það hins vegar ekki raunhæft.

„Mér finnst það endurspeglast í orðum Benedikt Jóhannssonar í gær þar sem að hann segir að það hafi verið lengra á milli þessara fimm flokka heldur en þeirra og sjálfstæðismanna. Það finnst mér eiginlega segja meira en margt annað. Þannig að ég sé ekki að það gæti gengið,“ segir Bjarkey og vísar til ummæla Benedikt Jóhannssonar, formanns Viðreisnar, í hádegisfréttum Bylgjunnar í gær.

Spennandi kostur

Varðandi framhaldið sé allt opið.„Það er auðvitað hægt að gera ýmislegt. Ég hef sagt að það gæti verið spennandi kostur, og kannski ákall eftir því með niðurstöðum kosninganna þar sem þær eru flóknar, að sjá saman Vinstri græn, Pírata og Sjálfstæðisflokkinn. Þó að það virðist vera útilokað, það er að segja bæði Sjálfstæðisflokkur og Píratar hafa útilokað hvorn annan. En þá gæti það verið svona spennandi niðurstaða,” segir Bjarkey.

Skoða samstarf við VG ef annað gengur ekki upp

Guðlaugur Þór Þórðarson, þingmaður Sjálfstæðisflokks, segir þá flokka sem ætla að starfa saman í ríkisstjórn þurfa að gefa eftir sínar ítrustu kröfur.

„Auðvitað snýst þetta um að ná annars vegar þeim málefnum sem að við leggjum áherslu á, ná þeim fram í stjórnarsáttmála, og hins vegar að það sé stjórnarmeirihluti sem að þoli þá ágjöf sem að verður alltaf þegar að ríkisstjórn starfar,” segir Guðlaugur.

Telur þú líklegt að það gæti orðið sátt um ríkisstjórn Sjálfstæðisflokks, Vinstri grænna og þriðja flokks?

„Það er einn af valkostunum. Ef að önnur módel ganga ekki saman að þá verða menn að skoða þann þáttinn, það segir sig sjálft,” segir Guðlaugur.