Heimastúlkur skelltu Svíum

Heimastúlkur í Brasilíu rúlluðu yfir Svíþjóð í E-riðli á Ólympíuleikunum í Ríó, en lokatölur urðu 5-1 sigur Brasilíu.

Beatriz kom Brasilíu yfir á 21. mínútu og Cristiane tvöfaldaði forskotið einunis fjórum mínútum síðar. Marta bætti svo við marki fyrir hlé og staðan 3-0 í hálfleik.

Marta var ekki hætt því þessi fyrrverandi besti leikmaður heims skoraði annað mark sitt og fjórða mark Brasilíu á 80. mínútu og Beatriz bætti enn einu markinu við á 86. mínútu.

Hin sænska Lotta Schelin bjargaði þó andliti Svíana með að minnka muninn á síðustu mínútu venjulegs leiktíma og lokatölur 5-1 sigur Brasilíu.

Brasilía er með fullt hús eftir fyrstu tvo leikina, en Svíþjóð er með þrjú stig. Svíþjóð mætir Kína næst og Brasilía mætir Suður-Afríku sem er án stiga.