Volkswagen áformar risarafhlöðuverksmiðju

Það er ekki bara Tesla sem vinnur að uppbyggingu risaverksmiðju þar sem framleiddar verða rafhlöður fyrir bíla því Volkswagen ætlar einnig að reisa eina slíka. Eftir dísilvélasvindlið sem Volkswagen var uppvíst að hefur Volkswagen breytt mjög áherslum sínum og einbeitt sér að smíði bíla sem ganga að hluta til eða að fullu fyrir rafmagni.

Til þess að svo megi verða í stórum stíl er þörf fyrir mjög stóra framleiðslueiningu á rafhlöðum og Volkswagen hyggst ekki ætla að láta aðra rafhlöðuframleiðendur útvega sér rafhlöður í bíla sína, heldur framleiða þær sjálfir.

Tesla er langt komið með smíði eigin risarafhlöðuverksmiðju í Bandaríkjunum og hófst smíði hennar árið 2014. Þar á að framleiða rafhlöður fyrir hálfa milljón bíla á ári og samtals nemur orka þeirra 35 gígavattstundum. Það er svo mikil framleiðslugeta að hún er álíka mikil og öll slík framleiðsla fyrir rafmagnsbíla og tengiltvinnbíla í heiminum í dag.

Volkswagen ætlar að framleiða 1 milljón ramagnsbíla á næstu 10 árum og það krefst mikillar framleiðslu á rafhlöðum. Ekki er ennþá orðið ljóst hvar slík verksmiðja Volkswagen verður staðsett og er verkefnið á borði stjórnar Volkswagen sem taka mun ákvörðun um það á næstu vikum.