Citroën SpaceTourer Hyphen

Tími strumpastrætóanna er ekki alveg liðinn þó svo sala þeirra hafa farið verulega dvínandi á síðustu árum. Bandaríkjamenn virðast vera orðnir mjög fráhverfir slíkum bílum (Vans), en evrópskir kaupendur eru ennþá móttækilegir fyrir þeim.

Til að gera svona bíla, sem stundum eru einnig kallaðir fjölnotabílar, meira spennandi hefur Citroën fengið fyrirtækið Hyphen Hyphen með sér í lið og útfært þennan SpaceTourer framleiðslubíl sinn í skemmtilegum og litaglöðum stíl.

Þessa útfærslu hans ætlar Citroën að sýna á bílasýningunni í Genf í næsta mánuði. SpaceTourer leysir af hólmi Combi bíla Citroën. Þessi SpaceTourer Hyphen er með 1,6 lítra dísilvél sem fæst frá 95 til 178 hestöflum og er beinskiptur með 6 gírum og eyðir afar litlu.

Hann mun fást í þremur lengdum og 5 til 9 manna, eftir útfærslum. Þessi Hyphen gerð bílsins er hærri frá vegi, er fjórhjóladrifinn og á stærri og grófari dekkjum sem hæfir getu hans. Hann er bæði litaglaður að innan sem utan eins og myndunum má sjá.

Þessi bíll virðist afar skemmtileg græja en guð hvað það væri skemmtilegt að smella í hann 707 hestafl Hellcat vélinni frá Chrysler. Væri þá þarna kominn einn heppilegasti partýbíll sem komast mætti yfir.