Fimm sem hverfa í ár

Bílaframleiðendur þurfa sífellt að vera á tánum og bjóða kaupendum bíla sem höfða til þeirra og því hverfa margar bílgerðir af sjónarsviðinum á hverju ári. Oftast þegar hætt er smíði ákveðinnar bílgerðar er það vegna dræmrar sölu, að bíllinn hlýti ekki lengur öryggis- eða mengunarkröfum eða að bílaframleiðandinn hefur ákveðið að skipta henni út fyrir aðra enn söluvænni bílgerð.

Nokkrir bílar munu hverfa úr sýningarsölunum þetta árið og sjást hér fimm þeirra. Sumum þeirra, ef ekki öllum, verður saknað af bílaáhugamönnum. Fyrstan skal telja þennan Mitsubishi Lancer Evolution X. Hann hefur verið framleiddur í 9 ár og það þykir dágott fyrir kynslóð bíls, en í tilviki þessa bíls kemur enginn annar í staðinn og er margur bílaáhugamaðurinn orðlaus yfir þessari ákvörðun Mitsubishi.

Lancer Evolution X er mjög dáður bíll og víst er að hann myndi seljast ágætlega áfram ef framleiðslu hans yrði áframhaldið. Svo verður þó ekki.

Framleiðslu Dodge Durango ST verður hætt á árinu og er 2015 módel hans það síðasta. Heyrst hefur að arftaki hans verði 7 sæta bíll, en svar við því verður að bíða til nokkurra ára. Sumir munu sakna V8 Hemi vélarinnar sem er í Dodge Durango ST og vígalegs útlits hans.

Einn af sögufrægustu bílum heims kveður líka þetta árið, Land Rover Defender, sem ekki lengu uppfyllir mengunarreglur. Einhver ár verður í arftaka hans og á meðan munu aðdáendur hans fella nokkur tár.

Framleiðslu verður einnig hætt á þessum Mini Cooper Coupe, en hann var reyndar ekki allra enda sköpulagið óvenjulegt og notadrýgni hans dregið í efa. Honum var þó fagnað af mörgum vegna mikils vilja til sköpunargáfu Mini. Þessi bíll náði reyndar aldrei flugi hvað sölu varðar og verður ef til vill ekki grátinn af mörgum.

Þessi Nissan XTerra kom reyndar aldrei til sölu hérlendis og var framleiddur fyrir Ameríkumarkað og hefur verið þar á markaði í meira en áratug. Hann er örlítið grófari torfæruútgáfa annars framleiðslubíls Nissan og hefur nú aldrei verið mærður fyrir aksturseiginleika, né heldur yfirburða torfæruhæfni. Því munu vafalaust fáir gráta hann lengi.