Körfuboltakvöld: Viðtal ársins | Myndband

Það er óhætt að segja að Viðar Örn Hafsteinsson, þjálfari Hattar, hafi stolið senunni í Domino's Körfuboltakvöldi í gær.

Eftir tap Hattar fyrir Þór í Þorlákshöfn, 85-61, fór Viðar afar hörðum orðum um frammistöðu sinna manna sem hafa tapað öllum 10 leikjum sínum í Domino's deildinni í vetur.

„Þetta var bara hræðilegt. Skelfileg frammistaða sem við sýnum hérna,“ sagði Viðar í samtali við Daníel Rúnarsson eftir leikinn í Þorlákshöfn í gær.

Viðar var afar ósáttur með marga af sínum leikmönnum sem unnu svo sannarlega ekki fyrir aurunum sínum í gær.

„Staðan var ekkert skelfileg í hálfleik, níu stigum undir. Svo mæta menn bara ekkert í seinni hálfleikinn. Mesta lagi 1-2 menn. Hinir hefðu alveg eins getað verið inn í klefa, þvílík hörmungar helvítis frammistaða var þetta,“ sagði Viðar saltvondur.

Þetta ótrúlega viðtal má sjá í spilaranum hér að ofan.