Ekki leiðinlegt að fara í taugarnar á Mayweather

Ronda Rousey virðist hafa virkilega gaman af því þegar henni tekst að fara í taugarnar á Floyd Mayweather.

Nú síðast var Mayweather að væla yfir því að Ronda hefði verið á forsíðu Ring-hnefaleikatímaritsins. Sagði að það væri slæmt fyrir hnefaleika að kona úr annarri íþrótt væri á forsíðu tímaritsins. Ronda segir þessa skoðun hans vera barnalega.

„Ég get ekki sagt að ég sé miður mín yfir því að hafa farið í taugarnar á honum og að hann geti ekki gert neitt við því," sagði Ronda stríðnislega, glotti og hló síðan.

Þessi stanslausu skot á milli Rondu og Mayweather hafa verið vinsælt fjölmiðlafóður en Ronda segist ekki leita þetta uppi. Hún einfaldlega svari spurningum er eftir því sé leitað.

„Ég sé ekki að það sé eitthvað neikvætt við að ég sé á forsíðu hnefaleikatímarits. Það er gott að það sé unnið saman í stað þess að rífast um að við eigum þessa aðdáendur en þið þessa. Báðar íþróttir græða á athyglinni. Að halda öðru fram er barnalegt."