UFC 193: Brotalamir í vörn Rousey?

Það verður sannkallaður stórviðburður í nótt þegar UFC 193 fer fram. Þar mætir ofurstjarnan Ronda Rousey hinni reyndu Holly Holm.

Ronda Rousey er óumdeilanlega stærsta stjarnan í UFC. Hún er tekjuhæsti íþróttamaðurinn í UFC og stórstjörnur á borð við Sylvester Stallone og Arnold Schwarzenegger keppast við að hrósa henni.

Hún hefur einnig verið tíður gestur í vinsælum spjallþáttum á borð við The Ellen DeGeneres Show og The Tonight Show with Jimmy Fallon. Með þessari auknu athygli hefur hún einnig fengið sinn skerf af gagnrýni og er meira rýnt í einkalíf hennar en nokkru sinni fyrr.

Fyrir skömmu viðurkenndi þungavigtarmaðurinn Travis Browne að hann og Rousey ættu í ástarsambandi. Það sem vekur helst athygli er að Browne hefur verið ásakaður um að ganga í skrokk á fyrrum eiginkonu sinni. Rousey hefur sjálf margoft gagnrýnt hnefaleikakappann Floyd Mayweather eftir að hann var dæmdur sekur um heimilisofbeldi. Í kjölfarið á þessum fréttum fékk Rousey sinn skerf af gagnrýni.

Sjá einnig: Slæm vika fyrur Rondu Rousey

Þá hefur mamma Rousey bæði gagnrýnt nýja kærastann og þjálfarann hennar, Edmond Tarverdyan, opinberlega. Mamma hennar hefur alltaf verið stór partur af liðinu og fagnað með henni í búrinu eftir bardaga. Í fyrsta sinn í UFC verður mamma hennar ekki með henni.

Mamman gæti haft eitthvað til síns máls þegar kemur að þjálfara Rousey. Edmond Tarverdyan hefur þjálfað Rousey frá því hún tók sín fyrstu skref í MMA en mamman sagði hann vera ömurlega manneskju sem ætti skilið að verða fyrir bíl.

Fyrr í mánuðinum lýsti Tarverdyan sig gjaldþrota þar sem hann sagðist hafa verið tekjulaus í nokkur ár og skuldar hinum ýmsu bönkum 700.000 dollara. Það er erfitt að trúa því að yfirþjálfari tekjuhæsta íþróttamanns UFC sé tekjulaus. Það væri ekki nema Tarverdyan hefði þjálfað Rousey ókeypis í öll þessi ár af einskærri góðmennsku. Því er erfitt að trúa og eflaust eitthvað gruggugt á seyði.

Gæti allt þetta verið brotalamir í vörn meistarans? Holly Holm mun eflaust reyna allt hvað hún getur til að sigra meistarann en þó hún eigi besta dag lífs síns verður það erfitt.

Það vinnur þó margt með henni þar sem hún er með tól sem gætu virkað vel gegn Rousey. Fyrir það fyrsta er Holm margfaldur heimsmeistari í boxi og er með gríðarlega reynslu. Holm mun væntanlega vera afar þolinmóð og nota fótavinnuna og spörkin til að halda Rousey frá sér.

Holm æfir hjá Greg Jackson í Albuquerque en hann er einn virtasti þjálfarinn í bransanum. Jackson er þekktur fyrir að leggja upp vel útfærðar leikáætlanir fyrir bardaga og verður forvitnilegt að sjá hvernig hann leggur upp bardagann í kvöld.

Fyrrum léttþungavigtarmeistarinn Jon Jones æfir með Holm en hann er einn sá besti í heimi þegar kemur að því að halda andstæðingnum frá sér með spörkum. Að sögn Holm hefur Jones verið afar hjálpsamur í undirbúningi hennar fyrir bardagann.

Fyrri andstæðingar Rousey vaða oftast í hana strax sem hefur gefið Rousey tækifæri á að klára bardagana á aðeins nokkrum sekúndum. Holm ætlar ekki að gera sömu mistök. Hún mun vera þolinmóð og velja höggin sín vel.

Þrátt fyrir neikvæða umfjöllum Rousey á undanförnu er ekkert sem bendir til þess að geta hennar innan búrsins sé síðri. Edith Bosche var síðasta konan til að vinna Rousey. Breytist það í kvöld?

Aðalhluti bardagakvöldsins verður í beinni útsendingu á Stöð 2 Sport og hefst bein útsending kl 3.