Swansea tók útskýringar Gylfa gildar

Ummæli sem Gylfi Þór Sigurðsson lét falla í viðtali við Fótbolta.net vöktu í gær athygli enskra fjölmiðla og eru nú komin á borð lögfræðinga Swansea, liðs hans í ensku úrvalsdeildinni.

Gylfi sagði að hann hefði ekkert heyrt frá Garry Monk, stjóra Swansea, um hvort að stjórinn hefði einhverjar óskir um hversu mikið hann spili með íslenska landsliðinu í vináttuleikjunum við Pólland og Slóvakíu, enda væri það þjálfara íslenska landsliðsins að ákveða það.

Enn fremur sagði Gylfi að Monk ræddi lítið við leikmenn. „Þegar við fórum áfram sendi hann ekki einu sinni leikmönnum frá Wales og Íslandi sms til að segja til hamingju. Ég hef ekkert heyrt í honum. Það er undir Lars og Heimi hvað ég spila mikið," sagði Gylfi í viðtalinu.

Þessi ummæli Gylfa voru tekin upp í fjölmiðlum í Bretlandi, bæði í Wales og á vefsíðum enskra dagblaða, svo sem Daily Mail.

Wales Online fjallaði svo um málið í gær og hafði eftir talsmanni félagsins að félagið hefði haft samband við Gylfa vegna málsins og að það hefði tekið útskýringar hans gildar.

Sjálfur sendi Gylfi frá sér yfirlýsingu í gær þar sem hann útskýrir ummæli sín frekar. „Það skiptir líka engu máli hvort ég hafi fengið SMS frá Gary Monk eða ekki með hamingjuóskum, því hann óskaði okkur auðvitað til hamingju þegar við mættum til æfinga eftir leikina við Holland og Kasakstan,“ sagði Gylfi meðala annars en yfirlýsinguna alla má lesa á Fótbolta.net.

„Ég bara kom því sem ég ætlaði að segja ekki nógu vel frá mér í þessu viðtali og úr því varð þessi leiðinlegi misskilningur. [...] samband mitt við Monk er gott,“ sagði í yfirlýsingu Gylfa.

Talsmaður Swansea segir ummælin og hvernig þau voru túlkuð í enskum fjölmiðlum séu nú á borði lögfræðinga félagsins. „Það er líka alveg ljóst að Garry Monk óskar hverjum einasta landsliðsmanni sem kemst á stórmót til hamingju. Skiptir engu máli um hvaða mót ræðir eða með hvaða landsliði hann spilar. Að gefa annað í skyn er rangt.“