Odom að byrja í sjúkraþjálfun

Fyrrum leikmaður LA Lakers og Clippers, Lamar Odom, er á ágætum batavegi eftir að hafa verið fundinn meðvitundarlaus á vændishúsi rétt fyrir utan Las Vegas.

Hann var lengi meðvitundarlaus og var óttast um líf hans fyrstu dagana. Odom er kominn úr öndunarvél og getur haldið uppi stuttum samræðum.

Það er þó ljóst að honum hefur tekist að skaða sjálfan sig mikið. Nú tekur við langt bataferli en hann á að hefja sjúkraþjálfun í dag. Þá verður athugað hvort, og þá hversu mikið, hann getur gengið.

Odom er farinn af spítalanum í Las Vegas og kominn á sjúkrahús í Los Angeles.

Odom spilaði í 14 ár í NBA-deildinni með Los Angeles-liðunum sem og með Miami og Dallas. Hann vann deildina tvisvar með Lakers og var valinn besti sjötti maður deildarinnar árið 2011.