Hoiberg er nýr þjálfari Bulls

Eins og búist var við ákvað Chicago Bulls að ráða Fred Hoiberg sem næsta þjálfara félagsins.

Hann tekur við liðinu af Tom Thibodeau sem var rekinn á dögunum. Hoiberg kemur til félagsins frá Iowa State-háskólanum. Hann er 19. þjálfarinn í sögu Bulls.

„Ég elska þennan hóp og fjölbreytni leikmanna. Við getum boðið upp á svo margt. Thibodeau er frábær þjálfari og ég vonast til þess að byggja ofan á grunninn sem hann bjó til," sagði Hoiberg.

Hoiberg vann 115 leiki með Iowa State og tapaði 56 leikjum. Hann fór með liðið fjórum sinnum í röð í NCAA-mótið.