Enn óvissa um meiðsli Garðars

Garðar Jóhannsson segir að enn sé óvitað hversu alvarleg meiðslin eru sem hann hlaut í leik Stjörnunnar og Leiknis í bikarkeppninni í vikunni. Garðar er meiddur í nára og finnur fyrir verk í lífbeininu.

Garðar fór meiddur af velli eftir að hafa komið inn á sem varamaður og fór í læknisskoðun í gær. „Það kom ekkert út úr myndatökunni þannig lagað. Ég fer í frekari skoðun í næstu viku,“ sagði Garðar við Vísi í dag.

„Það liggur ekki ekki fyrir hvað þetta er nákvæmlega en ég veit þó að ég er ekki brotinn.“

Rúnar Páll Sigmundsson, þjálfari Stjörnunnar, sagði við Fótbolta.net að hann reiknaði ekki með Garðari fyrr en um mitt mót.

„Ég vona að það verði fyrr en það en maður veit aldrei,“ segir Garðar.