Spilar fyrsti Indverjinn í NBA á morgun?

Sim Bhullar, leikmaður Sacramento Kings í NBA-körfuboltanum, mun líklega leika sinn fyrsta leik í NBA-körfuboltanum á morgun þegar liðið mætir New Orleans Pelicans.

Það er ekki frásögu færandi nema að Bhullar verður fyrsti Indverjinn til þess að spila í NBA. Hann skrifaði undir tíu daga samning við kóngana á dögunum, en liðið mætir eins og fyrr segir New Orleans á morgun.

Spili Bhullar á laugardag verður hann sá stærsti í deildinni þetta tímabilið, en hann er tveir metrar og 26 sentímetrar. Algjör risi.

Þessi 22 ára gamli Indverji, sem þó fæddist í Kanada, gekk í raðir Sacramento í ágúst 2014, en hefur verið að spila fyrir vinalið Sacramento, Reno Bighorn.