Til­lögur að nýjum Reykjavíkurhúsum í Vesturbugt og Kirkju­sandi

Borgarráð fjallaði í morgun um skýrslu starfshóps um nýju Reykjavíkurhúsin sem ætlunin er að rísi, meðal annars í Vesturbugt og á Kirkjusandi. Áttatíu íbúðir hið minnsta verða í Vesturbugt undir merkjum Reykjavíkurhúsa, en gert er ráð fyrir að hluti þeirra verði félagslegar. Þetta kemur fram í tilkynningu frá Reykjavíkurborg.

Lagðar voru fram tillögur um hvernig staðið verði að úthlutuninni en gert er ráð fyrir samstarfi við einkaaðila við uppbygginguna, auk félaga sem reka leigu- og búseturéttarhúsnæði. Auglýst verður sérstaklega eftir samstarfsaðilum í því skyni en borgarráð mun taka afstöðu til tillagnanna á næsta fundi sínum.

Í Vesturbugt við gömlu höfnina er gert ráð fyrir að byggist upp 24 þúsund fermetrar af mannvirkjum. Samkvæmt nýjum drögum að deiliskipulagi fyrir reitinn verða byggðar 165 íbúðir á reitnum sem skiptast í útsýnisíbúðir, almennar íbúðir og raðhús auk leikskóla. Á Kirkjusandsreitnum er gert ráð fyrir á annað hundrað íbúðum undir merkjum Reykjavíkurhúsa.

Um leið og útboðskilmálar hafa verið samþykktir verður auglýst eftir samstarfsaðilum en gera má ráð fyrir því um miðjan apríl.