Ég myndi vinna alla karlmenn í mínum þyngdarflokki

Ronda Rousey er líklega vinsælasta íþróttakona heims í dag og margir vilja sjá hana slást við karlmenn.

Rousey hefur fáranlega yfirburði í sínum flokki í UFC og kláraði síðustu tvo titilbardaga sína á 14 og 16 sekúndum. Hún hefur unnið alla 11 bardaga sína.

Umræðan um að hún eigi jafnvel að keppa við karlmenn fer ekkert fyrir brjóstið á henni.

„Ég er alls ekki móðguð. Ég held reyndar að fólki sé ekki fullalvara með þessu. Ég lít þó á það sem hrós að fólk spái í þessum möguleika," sagði Rousey í útvarpsþætti í Bandaríkjunum.

„Ég segi aldrei að ég geti ekki unnið þennan eða hinn. Fyrir mér eru engin takmörk í því sem ég get gert. Ef við erum bara að tala um möguleikana þá tel ég mig geta unnið alla karlana í sama þyngdarflokki," sagði Rousey borubrött.