Fáfræði, fordómar og foræðishyggja komi í veg fyrir UFC á Íslandi

„Greinilega troðfullt á pöllunum þarna á heimsmeistaramótinu í handbolta,“ segir Haraldur Dean Nelson, umboðsmaður og faðir Gunnars Nelson. Haraldur er ósáttur með stefnu RÚV og þann hrikalega mismun sem hann segir íþróttagreinar fá hjá ríkisfjölmiðlinum.

Íslenska karlalandsliðið steinlá sem kunnugt er fyrir Svíum í fyrsta leik sínum á HM í Katar í kvöld. Athygli vakti hve fáir áhorfendur voru í keppnishöllinni sem tekur um 7500 áhorfendur. Haraldur greip boltann á lofti og birti myndir frá minniháttar keppnum á vegum UFC en Gunnar keppir sem kunnugt er í bardögum á vegum UFC.

Post by Haraldur Dean Nelson.

Á myndunum má sjá mun fleiri áhorfendur en á landsleiknum í kvöld og bendir Haraldur á að um vikulegar viðburði sé að ræða, ekki stórmót á borð við heimsmeistaramót.

Sjá einnig:ÍSÍ hefur ekki áhuga á okkur

Haraldur segir í opinni færslu á Facebook að fólk megi ekki misskilja sig. Hann sé ekki að skjóta á handboltann. Hann hafi sjálfur gaman af handbolta og hafi alltaf haft.

„Ég er að tala um stefnu RÚV og þann hrikalega mismun sem íþróttagreinar fá hjá ríkisfjölmiðlinum,“ segir Haraldur. Hinir ýmsu sérfræðingar meti sem svo að blandaðar bardagalistir (MMA) sé ekki „main stream“ þ.e. höfði til mikils fjölda fólks. Greinilegt sé á fjölda áhorfenda á leik Íslands og Svía í Katar hve vinsæl „main stream“ íþrótt handbolti sé.

Gæti haldið UFC-keppni á Íslandi á morgun

Töluverð umræða hefur orðið á vegg Haraldar í kjölfar færslunnar. Er hann meðal annars spurður hvort líkur séu á því að UFC-bardagi verður haldinn á Íslandi. Fram hefur komið í máli Haraldur að UFC horfi hingað til lands í þeim efnum.

„Ég gæti haldið UFC keppni hérna á morgun ef ekki væri fyrir Effin þrjú,“ segir Haraldur. „Fáfræði, fordóma og foræðishyggju.“ Svo bætir hann við að líklega þyrfti hann grænt ljós frá Dana White, forseta UFC, en það sé líkast til auðfengið.

Þá bætir Haraldur við að fljótlega muni ráðast hvenær Gunnar berjist næst í UFC. Okkar maður tapaði sem kunnugt er sínum fyrsta bardaga gegn Rick Story í október síðastliðnum. Gunnar upplýsti í viðtali á dögunum að hann hefði aðeins horft einu sinni á bardagann.

Þá lýsti hann þeirri skoðun sinni í viðtali við Vísi að sjálfsagt væri að menn gengjust undir lyfjapróf í UFC. Jon Jones féll sem kunnugt er á lyfjaprófi á dögunum.

Bardaga Gunnars við Rick Story má sjá í spilaranum hér að neðan.