Gunnar Nelson: Ég mun koma til baka

„Ég er aðeins marinn á lærinu en annars er ég góður,“ segir GunnarNelson en hann var ansi lemstraður er Fréttablaðið hitti á hann í gær. Venjulega sér ekki á honum eftir bardaga en fimm lotna stríðið tók sinn toll af honum. Hann meiddist þó ekki alvarlega.

Bardagi hans og Rick Story fór nánast eingöngu fram standandi. Gunnar náði honum ekki í gólfið en þangað vildi Story alls ekki fara. Bardaginn fór alla leið og tveir dómarar af þremur dæmdu Story sigur í bardaganum.

Nú heim í salinn

„Þetta var erfiður fimm lotu bardagi. Við svoleiðis djöfluðumst hvor á öðrum. Mér fannst ég hafa sigrað fyrstu og aðra lotuna nokkuð örugglega. Þriðja var jöfn en hann var mun grimmari í síðustu tveim lotunum,“ segir Gunnar um bardagann en eins og áður segir kom hann Story nánast ekkert í gólfið þar sem Gunnar er bestur.

Gunnar sagði Story hafa verið mjög sleipan og erfitt að ná taki á honum eins og þeir sem fylgdust með bardaganum sáu.

„Nú er það heim í æfingasalinn og ég veit nú um ýmislegt sem þarf að laga. Eins og til að mynda jafnvægið standandi. Það hefði mátt vera betra upp á öndunina til að vera ferskari bæði í höggum og að ná andstæðingnum niður. Ég þarf að spá í þessu og vinna með þetta á næstunni. Ég er mjög sáttur með þennan bardaga því ég held að maður læri aldrei eins mikið og af svona bardaga. Það lenda allir í því að tapa.“

Aldrei valtur

Gunnar segir að undirbúningurinn hafi gengið vel og að honum hafi liðið vel fyrir bardagann. En kom Story honum á óvart?

„Það kom á óvart hversu sleipur hann var og hvernig hann gat haldið keyrslunni áfram. Hvernig hann gat sveiflað svona ægilega af krafti út allar loturnar,“ segir Gunnar og bætir við að hann hafi ekkert verið vankaður eftir að hafa verið sleginn niður. „Ég var aldrei neitt valtur. Mér fannst ég vera skýr allan tímann.“

Gunnar og hans menn töluðu um fyrir bardagann að það myndi henta honum vel að fara alla leið. Story sagði slíkt hið sama og það var Story sem var öflugri í lokalotunum.

„Það vantaði líklega upp á úthaldið hjá mér þó svo að við hefðum báðir verið mjög þreyttir. Hann hefur kannski meiri reynslu þegar komið er á þetta stig og hans stíll hentaði betur að þessu sinni. Það var magnað hvað hann gat sveiflað allt til enda. Hann vann líklega bardagann á því.“

Aftar í goggunarröðina

Okkar maður segir það ekki hafa haft áhrif á undirbúning sinn að vera án þjálfarans, John Kavanagh, í um tvær vikur rétt fyrir bardagann. Gunnar vildi fá mann á topp fimm fyrir þennan bardaga en fékk Story sem var ekki á topp fimmtán. Var hann að biðja um of mikið of snemma?

„Nei, ég held ekki. Svona bardagar eiga sér stað. Story hefur sigrað núverandi meistara og hann er einn af þessum gaurum sem geta komið upp aftur. Ég veit að ég fell aðeins aftur í goggunarröðinni núna en ég veit að ég mun koma til baka. Fá fínan andstæðing og halda áfram að klifra upp. Það er engin spurning að þessi reynsla mun styrkja mig. Þetta var hrikaleg orrusta,“ sagði Gunnar Nelson.