Vill komast til stærra liðs

„Það var gott að halda hreinu, skora fjögur mörk og vinna leikinn,“ segir Guðmundur Þórarinsson, miðjumaður U21 árs landsliðsins, í viðtali við Fréttablaðið, en Guðmundur og strákarnir völtuðu yfir Armeníu, 4-0, á Fylkisvelli á miðvikudaginn þar sem Guðmundur lagði upp eitt mark.

Hann hefur verið jafnbesti leikmaður U21 í undankeppninni, en liðið þarf nú nær örugglega að ná í stig gegn Frakklandi – langbesta liði riðilsins – á útivelli á mánudagskvöldið.

„Við eigum hiklaust möguleika á því, en þá þurfum við að spila mjög vel jafnt í vörn sem sókn. Maður getur alveg verið hreinskilinn og sagt Frakkana klassa betri en öll hin liðin í riðlinum. Við þurfum bara að stefna á sigur og vonandi hirða eitt stig,“ segir Guðmundur, en í franska liðinu eru strákar sem keyptir hafa verið hingað og þangað um Evrópu fyrir mörg hundruð milljónir undanfarin misseri.

„Það var einhver sem bar verðið á leikmönnum liðanna saman og það var alveg fáránlegur munur. En það á bara að hvetja okkur enn frekar. Þetta er sterkt lið sem refsar fyrir öll mistök, en við erum líka með góða leikmenn; stóra og sterka durga í vörninni sem eru líkamlega sterkir,“ segir Guðmundur.

Besti vinurinn seldur

Guðmundur átti bara eftir að klæða sig í sokkana eftir æfingu þegar Fréttablaðið náði tali af honum í gær. Hann var þá á leið í mat með æskuvini sínum frá Selfossi, Jóni Daða Böðvarssyni, sem fiskaði víti í leiknum á miðvikudaginn.

Báðir spila sem atvinnumenn í Noregi, Guðmundur með Sarpsborg 08, þar sem honum gekk frábærlega í fyrra. Hann var einn besti miðjumaður deildarinnar og á meðal efstu manna í nær öllum sendingaflokkum samkvæmt tölfræði norska blaðsins Verdens Gang. Guðmundi hefur einnig gengið vel í ár, en fór þó kannski ekki jafn vel af stað og hann hefði kosið.

„Ég komst almennilega í gang núna seinni partinn í deildinni. Ég spilaði ekkert illa fyrri partinn, en það voru hlutir í gangi eins og þegar maður hélt sig vera að fara frá liðinu. Svo gerðist það ekki og ofan á það var besti vinur minn seldur,“ segir Guðmundur og á þar við norska markahrókinn Mohamed Elyounoussi sem raðar nú inn mörkum fyrir topplið Molde.

„Það var svekkjandi að sjá á eftir honum því við vorum bestu vinir jafnt innan sem utan vallar. Mér var lofað að hópnum yrði haldið saman sem hafði áhrif á val mitt að vera áfram. Svo fer hann og þá var ég ekki alveg jafn hamingjusamur. Ég er frekar léttur gæi og meðan það er skemmtilegt og jákvætt í kringum mig er ég alltaf bestur. En ég vann mig bara í gegnum þetta og tók andlega þáttinn í gegn. Þarna lenti maður í hlut sem maður gat ekki stjórnað sjálfur og þá tók maður bara stjórnina sjálfur og styrkti sig inn á við,“ segir Guðmundur.

Vill taka næsta skref

Selfyssingurinn sparkvissi vakti áhuga annarra liða eftir frammistöðuna á síðustu leiktíð og hafði hann möguleika á að fara til nýs liðs á lokadegi félagaskipta í janúar. Hann ákvað þó að vera áfram og segist ekki sjá eftir því. Þegar tímabilinu lýkur í vetur stefnir hann þó að því að taka næsta skref.

„Ég hef verið að spila álíka vel og í fyrra og maður heyrir alltaf af áhuga annarra liða. Það er samt aldrei neitt öruggt fyrr en maður skrifar undir. Ég vil fara til stærra liðs og ef það verður innan Noregs vil ég fara í toppbaráttu. En ef það kemur eitthvað upp utan Norðurlandanna skoða ég það bara,“ segir Guðmundur.

„Þetta er bara svo harður bransi eins og ég fékk að kynnast þegar þeir töldu mig á að halda áfram en seldu svo Elyounoussi. Þetta er miklu harðara en maður bjóst við þó ég sé „bara“ í Sarpsborg í Noregi. Maður getur bara rétt ímyndað sér hvernig hlutirnir ganga fyrir sig í ensku úrvalsdeildinni eða stærri deildum Evrópu.“

Tónlistin truflar ekki

Eins og bróðir hans, Ingólfur Þórarinsson Veðurguð, er Guðmundur fantagóður tónlistarmaður; spilar á gítar og syngur eins og engill. Lag með honum var á toppi vinsældalistanna hér heima í sumar svo dæmi sé tekið. Þó hann hafi gaman að því að spila og syngja er það ekki eitthvað sem hefur áhrif á fótboltaferilinn.

„Alls ekki. Ég er algjörlega með hugann við fótboltann og það er ósanngjarnt að halda öðru fram. Þeir aðilar sem halda annað þekkja mig ekkert og vita ekki hvað ég hef lagt á mig. Ég hef ekki tekið eitt gigg úti í Noregi og geri ekki heldur heima nema í einhverjum gleðskap fyrir vini mína. Tónlistin tekur ekkert frá boltanum!“ segir hann ákveðinn og bætir við:

„Ég get bara farið í tónlistina þegar ég hætti í boltanum 35 ára. Það er bara fínt að hafa eitthvað að gera með boltanum. Mér finnst uppbyggjandi og gott að dunda mér við að spila á gítarinn, semja texta og syngja aðeins frekar en að horfa á sjónvarpið.“