Læknir segir Schumacher á batavegi

Eiríkur Stefán Ásgeirsson skrifar 23. október 2014 13:05

Læknir sem annaðist ökuþórinn Michael Schumacher í hálft ár segir að hann hafi tekið einhverjum framförum frá skíðaslysinu í desember síðastliðnum.

Schumacher hlaut alvarlega höfuðáverka þegar hann féll á skíðum í frönsku ölpunum og lenti með höfuðið á grjóti. Honum var lengi haldið sofandi á meðan læknar börðust við áverka á heila Schumachers.

Schumacher er ekki lengur í dái og hlýtur nú umönnun á heimili sínu í bænum Gland í Sviss. Jean-Francois Payen, læknir sem annaðist hann á sjúkrahúsinu í Grenoble, vitjar hans reglulega þar.

Payen var í viðtali hjá frönsku útvarpsstöðinni RTL og Le Parisien dagblaðinu í dag þar sem hann segist hafa orðið vitni að því að Schumacher hafi tekið framförum á þessum tíma. Hann sagði á sínum tíma að Schumacher þyrfti langan tíma til að jafna sig, allt frá einu ári til þriggja.

„Ég hef tekið eftir einhverjum framförum en ég myndi segja að hann þurfi lengri tíma. Það þarf að sýna honum þolinmæði,“ sagði hann.

„Við vitum að sumir geta þurft 3-4 ár í endurhæfingu. Það fer allt eftir alvarleika meiðslanna og aldri og líkamlegu ástandi viðkomandi.“

Formúla 1 Skíðaslys Michael Schumacher

Tengdar fréttir

Endurhæfing Schumacher færð á heimili hans

Talskona Michael Schumacher staðfesti í dag að Schumacher hefði verið fluttur af spítalanum í Lausanne á heimili sitt þar sem endurhæfingin mun halda áfram.

9. september 2014 14:00

Batahorfur Schumacher sagðar hverfandi

Þýskur fjölmiðill fullyrðir að Michael Schumacher hafi verið fluttur af gjörgæsludeild og sé ekki lengur í lífshættu.

13. júní 2014 17:04

Myndavélin á hjálmi Schumacher gerði mestan skaða

Nýjustu fréttirnar af formúlugoðsögninni Michael Schumacher eru þær að hinn 45 ára gamli Þjóðverji sé enn að vakna úr dáinu því að það ferli er allt mjög hægt. Þetta er haft eftir fimmtán ára syni hans Mick. Það er einnig komið í ljós að það var myndavélin á hjálmi hans sem orsakaði mesta skaðann.

12. október 2014 11:30