Framlag Íslands til byggingar höfuðstöðva NATO hækkar aftur

Aftur þarf að hækka framlag Íslands til byggingar nýrra höfuðstöðva Atlantshafsbandalagsins, NATO. Í fjárlagafrumvarpi næsta árs er farið fram á 14,4 milljóna króna hækkun á tímbundnu framlagi vegna höfuðstöðvabyggingarinnar. Það er viðbót við 104,2 milljóna króna framlag sem var samþykkt á fjárlögum ársins 2014.

Framlagið er reiknað í evrum en framlag Íslands á næsta ári er áætlað 747.552 evrur. Á síðasta ári var það 647.312 evrur og er hækkunin því ekki tilkomin vegna sveiflum á gengi krónunnar. Heildarframlög Íslands kemur til með að vera 2.937.186 evrur, sem samsvarar rúmlega 450 milljónum króna á viðmiðunargengi í frumvarpinu, gangi áætlanir um bygginguna eftir.



Þrátt fyrir þetta er reiknað með því að framlög til NATO lækki á næsta ári á heildina litið frá því sem nú er.



Heildarkostnaður við byggingu nýju höfuðstöðvanna er áætlaður 750 milljónir evra. Það samsvarar um 115 milljörðum íslenskra króna, samkvæmt gengi dagsins í dag. Íslendingar borga aðeins lítinn hluta af þessari upphæð en framlög Íslands eiga að standa undir sem nemur 0,043 prósent af rekstri stofnunarinnar.