Umhverfis jörðina á Mini

Tveir Þjóðverjar fengu þá undarlegu hugmynd að aka Mini Countryman bíl umhverfis jörðina og hafa nú næstum klárað ferð sína. Þeir lögðu upp frá hinum fallega bæ Heidelberg í Þýskalandi, óku þaðan gegnum Pólland, Eistrasaltslöndin, Rússland, Kóreu og Japan.

Það var helst ævintýraþrá tvímenninganna sem fékk þá til frarinnar, þó svo þeir hafi fengið nokkra styrktaraðila til að þátt í kostnaðinum. Setja þurfti auka eldsneytistank í bílinn, ekki síst til að komast lengri leiðir í austurhluta Rússlands.

Þaðan var bíllinn fluttur til vesturstrandar Bandaríkjanna í flugi og óku þeir síðan þvert yfir landið, þar sem ferðin endaði í New York. Að sögn þeirra leiðangursmanna, Fritz Kreis og Thomas Fürst, urðu engin vandræði að fara yfir landamæri alla ferðina og að þeir hafi ekki síður vingast við landamæraverði en annað fólk á langri leið sinni.

Engin þörf hafi verið á að múta þeim með amerískum sígarettum eða bera á það fé. Þá hafi það einnig komið þeim í opna skjöldu að vera boðið í tjöld hirðingja og að gestrisni þeirra væri eitthvað sem aldrei liði þeim úr minni. Nú er verið að flytja bílinn frá New York til Bremenhaven og þaðan munu þeir aka honum til Heidelberg og ljúka hringnum. Ekki leiðinlegt hjá þeim í sumar.