707 hestafla Challenger á 7 milljónir

Þeir eru ekki margir bílarnir yfir 700 hestöfl sem fá má á 7 milljónir króna. Chrysler ætlar þó að bjóða kaupendum uppá Dodge Challenger og Dodge Charger í 707 hestafla SRT Hellcat útfærslu og mun verð þeirra verða í kringum 61.000 dollarar, eða um 7 milljónir króna.

Þessir bílar fara kvartmíluna á um 10,5 sekúndum og eru með hámarkshraða uppá 328 km/klst. Chrysler hefur viðurkennt að lítill markhópur sé fyrir svona bíla en stundum þurfi fyrirtækið að bjóða bíla sem fáir hafa beðið um, en koma á óvart.

Salan á þessum bílum er ekki hafin en svo mun verða á fyrsta ársfjórðungi næsta árs. Bílarnir verða fyrst sýndir á bílasýningunni í New York seinna á þessu ári. Til að setja afl og verð þessara bíla í eitthvert samhengi þá má fá Mercedes Benz S65 AMG með 621 hestafl undir húddinu á 222.925 dollara, eða 25,6 milljónir króna, eða hátt í fjórum sinnum meira fé.

Bentley Flying Spur sem skartar 616 hestöflum frá 12 strokka vél, rétt eins og Bensinn, kostar um 200.000 dollara, eða 23 milljónir króna. Sá bíll sem næst kemst þessum Hellcat bílum hvað varðar afl og verð er líklega Cadillac CTS-V með 565 hestafla vél, en hann kostar 65.825 dollara, eða 7,6 milljónir. Hann skortir hinsvegar 142 hestöfl í Hellcat bílana og er dýrari.