Flugeldasýning milli Pickett og McCall áður en Gunnar berst

Annað kvöld snýr Gunnar Nelson aftur í búrið þegar hann mætir Bandaríkjamanninum Zak Cummings. Bardaginn er einn af fjórum bardögum á aðal hluta bardagakvöldsins sem sýndur verður á Stöð 2 Sport. Fyrstu tveir bardagar kvöldsins verða hörku spennandi viðureignir í léttvigt og fluguvigt.

Norman Parke (19-2-1) gegn Naoyuki Kotani (33-10-7) - léttvigt (70 kg)

Norman Parke og Naoyuki Kotani mætast í fyrsta bardaga kvöldsins á Stöð 2 Sport. Norman Parke er frá Norður írlandi og því hálfgerður heimamaður í þessum bardaga. Hann sigraði The Ultimate Fighter: Smashes þáttaröðina en þar öttu Bretar kappi við Ástrali. Parke hefur sigrað þrjá bardaga í UFC en gerði jafntefli í hans síðasta bardaga eftir að stig hafði verið dregið af honum fyrir að toga í stuttbuxur andstæðings síns.

3 atriði til að hafa í huga

• Hefur ekki tapað í rúm fjögur ár
• Með svart belti í júdó og varð N-Írlandsmeistari í júdó og frjálsri glímu aðeins 19 ára.
• Hávaxnari og faðmlengri en andstæðingur sinn.

Naoyuki Kotani er reynslubolti sem hóf ferilinn fyrir 14 árum en er þrátt fyrir það aðeins 32 ára. Hann hefur unnið síðustu 13 bardaga sína, sem allir hafa farið fram í Japan. Af þeim 33 bardögum sem hann hefur sigrað hafa 30 sigrar komið eftir annað hvort rothögg eða uppgjafartak. Kotani mun því líklega reyna að klára bardagann snemma en Parke verður að teljast sigurstranglegri fari þessi bardagi í dómaraúrskurð.

3 atriði til að hafa í huga

• Mjög reynslumikill með 50 bardaga
• Hefur sigrað 25 af 33 bardaga með uppgjafartaki
• Hefur aðeins unnið tvo bardaga utan Japans á ferlinum

Brad Pickett (24-8-0) gegn Ian McCall (12-4-1) - fluguvigt (57 kg)

Brad Pickett átti upprunalega að mæta Ian McCall síðast þegar UFC kom til Bretlands í febrúar en McCall þurfti að draga sig frá vegna meiðsla. Okkar maður Gunnar Nelson keppti á þeim viðburði líkt og verður raunin 19. júlí. Pickett er einstaklega skemmtilegur bardagakappi og hefur forseti UFC, Dana White, lýst því yfir að Pickett sé einn af þeim bardagaköppum sem honum þykir skemmtilegast að horfa á.

3 atriði til að hafa í huga

• Sigraði núverandi fluguvigtarmeistarann Demetrious Johnson árið 2010
• Breskur og mun njóta stuðnings heimamanna
• Hefur keppt í fjórum þyngdarflokkum á ferlinum

Ian McCall, eða Uncle Creepy eins og hann er kallaður, hefur átt misjöfnu gengi að fagna í UFC. Hann kom inni í samtökin með 11-2 bardagaskor en hefur síðan tapað tveimur, gert eitt jafntefli og aðeins unnið einn bardaga. Þrátt fyrir það er hann alltaf spennandi og bardaginn við Pickett gæti orðið algjör flugeldasýning tveggja frábærra bardagamanna.

3 atriði til að hafa í huga

• Fékk bónus fyrir bardaga kvöldsins í síðasta bardaga sínum
• Með fjólublátt belti í BJJ
• Númer þrjú í fluguvigtinni skv. styrkleikalista UFC

Gunnar Nelson mætir Zak Cummings í Dublin á laugardagskvöld.  Þessi stórbardagi verður í beinni á Stöð 2 Sport og hefst útsending kl. 19:00.  Fáðu þér áskrift áwww.365.is.

Vísir og MMA Fréttir starfa saman í umfjöllun um MMA. Ekki gleyma að setja "like" við Facebook síðu þeirra hér.