Thiago ekki með gegn United

Thiago Alcantara, miðjumaður Bayern Munchen, mun missa af leikjum liðsins gegn Manchester United í átta liða úrslitum Meistaradeildar Evrópu vegna meiðsla.

Spánverjinn varð fyrir meiðslum í leik nýkrýndra Þýskalandsmeistara Bayern Munchen gegn Hoffenheim í gær og þurfti að yfirgefa völlinn eftir 25 mínútna leik.

Samkvæmt tilkynningu frá Bayern verður Thiago frá í 6-8 vikur sem þýðir að hann mun einnig missa af undanúrslitum Meistaradeildarinnar, komist Bayern þangað.

Thiago gekk til liðs við þýska stórliðið frá Barcelona síðasta sumar og hefur átt góðu gengi að fagna með liðinu á tímabilinu.