Beckham ætlar að reyna að fá Xavi til Miami

David Beckham er að koma af stað atvinnumannaliði í Miami í Bandaríkjunum og nú bíða margir spenntir eftir því að sjá hvaða stórstjörnur skella sér vestur um haf til að spila fyrir Beckham.

Áður hefur komið fram draumur David Beckham um að fá Cristiano Ronaldo til að spila með Miami-liðinu og Beckham ætlar einnig að reyna að lokka Barcelona-manninn Xavi Hernandez til Bandaríkjanna samkvæmt frétt í Daily Mail í dag.

Samningur Xavi og Barcelona rennur út árið 2016 en Miami-liðið spilar ekki fyrsta tímabilið sitt í Major League Soccer deildinni fyrr en 2017.

Xavi verður 36 ára gamall þegar samningurinn rennur út en hann hefur spilað allan feril sinn með Barcelona. Hann var nálægt því að fara til Bayern München árið 2008 en valdi það að spila áfram með Barcelona.

Xavi er nú fyrirliði Barcelona og hann er einn sigursælasti knattspyrnumaður allra tíma enda búinn að vinna marga titla með bæði Barca og spænska landsliðinu.