Í fjárleitum með fjalldrottningu

Kristján Már Unnarsson heldur áfram að kynna áskrifendum Stöðvar 2 áhugaverða staði, fólk og starfsemi á landsbyggðinni í þætti sínum Um land allt.

Þátturinn hóf göngu sína síðasta vetur og er óhætt að segja að hann hafi slegið í gegn. Þeir voru með vinsælustu þáttum stöðvarinnar síðasta vetur og mældust stundum með meira áhorf en fréttatími Stöðvar 2, að sögn Kristjáns.

Í þættinum í spilaranum hér fyrir ofan er hægt að fylgjast með því þegar Kristján Már fór með fjallmönnum Gnúpverja í lengstu fjárleitir á Íslandi, sem tíunda árið í röð var stjórnað af fjalldrottningu, Lilju Loftsdóttur.

Í næsta þætti verða Kristján Már og Baldur Hrafnkell Jónsson kvikmyndatökumaður á Norðausturlandi. „Við förum um byggðir Öxarfjarðar og Skjálfandaflóa og kynnum okkur rannsóknir sem gerðar hafa verið á undanförnum áratugum á gasi sem þar hefur fundist. Við spyrjum hvaða líkur séu á að finna olíu- og gaslindir úti fyrir ströndum Norðurlands og fjöllum um nýjustu rannsóknir á þessu sviði.“ 

Kristján Már segist sjá mikinn mun á landsbyggðinni undanfarna áratugi.

„Þegar ég var ungur bjó um þriðjungur landsmanna á Reykjavíkursvæðinu. Í dag hefur þetta snúist við, sem er uggvænleg þróun að mínu mati. Ég finn líka sterka þrá hjá fólki um land allt að sjá heimabyggð sína vaxa og dafna.“

Þar skipti miklu máli að huga að samgöngum og öðrum innviðum eins og háhraðaneti, að sögn Kristjáns. Góðar samgöngur í dreifbýlinu eru nefnilega líka fyrir þéttbýlisbúa. „Þær skipta auðvitað meira máli yfir veturinn enda ekki síður heillandi að skoða Ísland að vetrarlagi.”