Var svolítið "peppaður“ fyrir þennan leik

Íslenska körfuboltalandsliðið sýndi sitt rétta andlit í átta stiga sigri á Rúmenum, 72-64, í undankeppni EM 2015 í gær. Íslenska liðið á því enn möguleika á að komast upp úr riðlunum en tveir síðustu leikir íslenska liðsins fara fram í Laugardalshöllinni.

Enginn lék betur í íslenska liðinu í gær en einmitt Haukur Helgi Pálsson sem skoraði 24 stig þar af 11 stig í fyrsta leikhlutanum sem íslenska liðið vann 25-10.

„Það er flott að koma svona til baka eftir 30 stiga tap í Búlgaríu,“ sagði Haukur Helgi og bætti við:

„Ég held að byrjunin hafi lagt grunninn að sigrinum. Við komum brattir út, spiluðum vel saman og náðum auðveldum körfum.“ Íslenska liðið komst í 16-2.

Íslenska liðið komst mest 18 stig yfir en Rúmenarnir náðu að minnka muninn niður í þrjú stig. „Ég fékk aldrei þá tilfinningu að við værum að fara að tapa þessu,“ sagði Haukur sem hitti úr 9 af 16 skotum sínum.

„Þetta er besti leikurinn minn. Ég var svolítið „peppaður“ fyrir þennan leik því ég spilað svo lítið í síðasta leik vegna villuvandræða. Ég þurfti að gefa af mér núna og standa mig. Það voru líka miklu fleiri að hjálpa til heldur en í síðasta leik og það voru allir að finna alla. Við vorum að finna glufur í þeirra vörn sem við nýttum okkur,“ sagði Haukur.

Síðustu tveir leikir íslenska liðsins eru í Höllinni og liðið á enn möguleika á því að komast áfram.

„Við þurfum bara að fá áhorfendurna í stúkuna til þess að hvetja okkur áfram og þá er allt hægt. Þetta var eins og við erum búnir að vera að spila í sumar. Við spiluðum ekki vel á móti Búlgaríu og það voru okkar mistök. Það gerist ekki aftur,“ sagði Haukum að lokum.