AC Milan mun reyna að stöðva Messi

Sextán liða úrslitin í Meistaradeild Evrópu halda áfram í kvöld. Þá tekur Galatasaray á móti Schalke en Barcelona sækir AC Milan heim. Aðalleikur kvöldsins er eðlilega rimma stórveldanna Milan og Barcelona.

„Það eru gríðarlega mikilvægir leikir fram undan hjá okkur. Við gerum okkur vel grein fyrir því að leikurinn gegn Milan verður gríðarlega erfiður þó svo fjölmiðlar keppist við að tala Milan niður," sagði miðjumaður Barcelona, Xavi.

„Milan hefur unnið fleiri Evróputitla en við. Það er mjög erfitt að leggja þetta lið að velli. Við munum aftur á móti mæta beittir og sýna hvort liðið er betra."

Margir eru spenntir fyrir að sjá nýtt lið Galatasaray en liðið hefur bætt við sig þeim Wesley Sneijder og Didier Drogba í janúar.

„Við erum klárir og getum hreinlega ekki beðið eftir því að spila þennan leik. Þetta verður frábær leikur," sagði Sneijder sem kom til liðsins frá Inter.

„Við eigum að spila okkar leik og fara með forskot til Þýskalands. Við þekkjum styrkleika og veikleika Schalke. Það skiptir samt mestu máli að við spilum vel. Við ætlum að gefa í og vinna leikinn."

Leikirnir hefjast klukkan 19.45 og eru í beinni á sportrásum Stöðvar 2.