NBA: Langar sigurgöngur San Antonio og Portland enduðu í nótt

Phoenix Suns og Oklahoma City Thunder enduðu 11 leikja sigurgöngur Portland Trail Blazers og San Antonio Spurs í NBA-deildinni í körfubolta í nótt. LeBron James leiddi Miami  til sigurs á hans gamla félagi og Chris Paul meiddist þegar Los Angeles Clippers sá til þess að New York Knicks tapaði sínum sjöunda leik í röð.

Kevin Durant var með 24 stig og 13 fráköst þegar Oklahoma City Thunder vann 94-88 sigur á San Antonio Spurs en með því endaði 11 leikja sigurganga San Antonio liðsins. Reggie Jackson (23 stig, hitti úr 10 14 skotum) og  Jeremy Lamb (12 stig, hitti úr 5 af 7 skotum) voru dýmætir fyrir Thunder-liðið. Serge Ibaka  var með 17 stig og 11 fráköst fyrir OKC sem hefur unnið alla sjö heimaleiki tímabilsins til þessa. Tony Parker var með 16 stig og 7 stoðsendingar fyrir Spurs.

Goran Dragic skoraði 31 stig og gaf 10 stoðsendingar þegar Phoenix Suns vann 120-106 sigur á Portland Trail Blazers en Portland var búið að vinna ellefu leiki í röð og hafði ekki tapað síðan á móti Houston Rockets 5. nóvember. Portland hefur aðeins tapað þrisvar í vetur en tveir tapleikjanna hafa komið á móti Phoenix. Channing Frye var með 25 stig fyrir Phoenix og tvíburarnir Markieff Morris (19 stig) og Marcus Morris (15) skoruðu saman 34 stig. LaMarcus Aldridge var stigahæstur hjá Portland með 24 stig.

LeBron James skoraði 28 stig, tók 8 fráköst og gaf 8 stoðsendingar þegar Miami Heat vann 95-84 sigur á hans gamla liði Cleveland Cavaliers. Þetta var áttundi sigur Miami í röð og ellefti sigurinn í tólf leikjum á móti Cleveland síðan að James skipti um lið. Dwyane Wade skoraði 22 stig og Michael Beasley var með 17 stig. Dion Waiters var stigahæstur hjá Cleveland með 24 stig.

Chris Paul meiddist aftan í læri þegar Los Angeles Clippers vann 93-80 sigur á New York Knicks. Paul var með 15 stig og 7 stoðsendingar og Blake Griffin bætti við 15 stigum og 13 fráköstum. J.J. Redick var líka með 15 stig fyrir Clippers-liðið sem fagnaði sínum áttunda sigri í síðustu tíu leikjum. Carmelo Anthony var með 27 stig í sjöunda tapi New York Knicks í röð.

Nick Young kom með 26 stig inn af bekknum þear Los Angeles Lakers vann 99-94 sigur á Brooklyn Nets þrátt fyrir að missa niður 27 stiga forskot. Pau Gasol skoraði 21 stig fyrir Lakers en hjá Nets var Joe Johnson stigaghæstur með 18 stig þrátt fyrir að klikka á 9 af 10 skotum sínum í seinni hálfleik. Paul Pierce var heldur ekki að hjálpa Brooklyn-liðinu mikið með því að nýta aðeins 4 af 17 skotum sínum.

Úrslit allra leikja í NBA-deildinni í nótt:

Charlotte Bobcats - Indiana Pacers 74-99

Orlando Magic - Philadelphia 76ers 105-94

Boston Celtics - Memphis Grizzlies 93-100

Brooklyn Nets - Los Angeles Lakers 94-99

Cleveland Cavaliers - Miami Heat 84-95

Detroit Pistons - Chicago Bulls 79-99

Houston Rockets - Atlanta Hawks 113-84

Milwaukee Bucks - Washington Wizards 92-100 (framlengt)

Minnesota Timberwolves - Denver Nuggets 110-117

Oklahoma City Thunder - San Antonio Spurs 94-88

Dallas Mavericks - Golden State Warriors 103-99

Phoenix Suns - Portland Trail Blazers 120-106

Los Angeles Clippers - New York Knicks 93-80