Jón Guðni fékk langþráð tækifæri í sigri Sundsvall

Jón Guðni Fjóluson var í byrjunarliði Sundsvall í fyrsta sinn síðan 23. maí þegar Sundsvall-liðið vann 1-0 útisigur á Ljungskile í sænsku b-deildinni í fótbolta í kvöld.

Jón Guðni lék í miðri vörn Sundsvall sem hélt hreinu í fyrsta sinn síðan 12. ágúst. Sundsvall var auk þess búið að leika þrjá leiki í röð án þess að vinna og hafði fyrir vikið dottið niður í þriðja sæti deildarinnar.

Jón Guðni spilaði allan leikinn en Rúnar Már Sigurjónsson kom inn á 85. mínútu fyrir Pa Amat Dibba sem skoraði einmitt eina mark leiksins á 41. mínútu.

Jón Guðni var búinn að sitja þolinmóður á bekknum í síðustu þrettán deildarleikjum Sundsvall en nýtti tækifærið vel þegar það gafst í dag.