Gerði sig að fífli

Stuðningsmaður Miami Heat vaknaði vafalítið við vondan draum í morgun þegar hún kynnti sér umfjöllunarefni íþróttamiðla vestanhafs.

Miami Heat leiddi Chicago Bulls til slátrunar í öðrum leik liðanna í undanúrslitum Austurdeildar NBA í nótt. Miami vann með 37 stigum sem er stærsta tap Chicago í úrslitakeppni frá upphafi.

Fátt féll með Chicago í nótt og var miðherjanum Joakim Noah meðal annars vikið úr húsi. Á leið sinni af vellinum lét par í stúkunni miðherjann heyra það og konan gerði gott betur. Langatöng fór upp í loft og hefur mynd af atvikinu farið sem eldur í sinu um netheima í dag.

Hegðun íslenskra stuðningsmanna hefur verið til umfjöllunar undanfarna daga en óhætt er að fullyrða að víða um heim sé pottur brotinn þegar stuðningsmenn íþróttaliða eru annars vegur.