Tracy McGrady samdi við San Antonio Spurs

San Antonio Spurs hefur bætt við reynslubolta í leikmannahóp sinn fyrir úrslitakeppnina í NBA-deildinni í körfubolta. Tracy McGrady hefur snúið heim frá Kína og verður með Spurs-liðinu í baráttunni um meistaratitilinn.

Tracy McGrady er 33 ára gamall og var á sínum tíma einn af bestu leikmönnum deildarinnar. Hann hefur leikið 938 NBA-leiki á ferlinum og er með 19,6 stig, 5,6 fráköst og 4,4 stoðsendingar að meðaltali í leik í þeim. McGrady hefur skorað 25,2 stig að meðaltali í 44 leikjum sínum í úrslitakeppni.

McGrady hefur spilað með Toronto, Orlando, Houston, New York Knicks, Detroit og Atlanta til þessa á ferli sínum. Hans blómatími var með Orlando og Houston en meiðsli settu síðan mikinn svip á frammistöðu hans.

McGrady var að gera góða hluti í Kína fyrr í vetur en hann var með 25 stig og 7,2 fráköst að meðaltali með liði Qingdao. Hann æfði með Spurs-liðinu áður en hann fór til Kína en bætist nú í leikmannahóp Gregg Popovich fyrir úrslitakeppnina.