NBA: Kobe með sigurkörfuna - fjórtán sigrar í röð hjá Miami

Kobe Bryant var öflugur á lokasprettinum þegar Los Angeles Lakers vann nauman sigur í NBA-deildinni í körfubolta í nótt en bæði Miami Heat og Oklahoma City Thunder fögnuðu sigri í stórleikjum gærkvöldsins.

Kobe Bryant skoraði 11 af 34 stigum sínum í fjórða leikhluta og sigurkörfuna níu sekúndum fyrir leikslok þegar Los Angeles Lakers vann 99-98 sigur á Atlanta Hawks. Steve Blake stal síðan boltanum í lokasókninni og kom í veg fyrir að Atlanta næði skoti í sinni síðustu sókn. Lakers komst þar með upp í 50 prósent sigurhlutfall í fyrsta sinn í tvo mánuði. Steve Nash var með 15 stig og 10 stoðsendingar og Dwight Howard skoraði 11 stig og tók 15 fráköst. Al Horford skoraði 24 stig fyrir Hawks.

LeBron James var með 29 stig, 11 fráköst og 7 stoðsendingar þegar Miami vann 99-93 útisigur á New York Knicks þrátt fyrir að lenda sextán stigum undir. Þetta var fjórtándi sigur Miami-liðsins í röð sem er nýtt félagsmet. Dwyane Wade var með 20 stig, 8 fráköst og 8 stoðsendingar. Carmelo Anthony skoraði 32 stig fyrir New York og Jason Kidd bætti við 14 stigum, 8 fráköstum og 6 stoðsendingum.

Kevin Durant skoraði 35 stig og Russell Westbrook var með 29 stig og 10 stoðsendingar þegar Oklahoma City Thunder vann 108-104 útisigur á Los Angeles Clippers og endaði um leið þriggja leikja útitaphrinu sína. Chris Paul var með 26 stig fyrir Clippers og þeir Blake Griffin og Jamal Crawford skoruðu báðir 20 stig. Oklahoma City hefur nú unnið alla þrjá leiki liðanna í vetur.

Öll úrslit í NBA-deildinni í nótt:

New York Knicks - Miami Heat 93-99

Los Angeles Clippers - Oklahoma City Thunder 104-108

Washington Wizards - Philadelphia 76Ers 90-87

Orlando Magic - Memphis Grizzlies 82-108

Sacramento Kings - Charlotte Bobcats 119-83

Houston Rockets - Dallas Mavericks 136-103

San Antonio Spurs - Detroit Pistons 114-75

Indiana Pacers - Chicago Bulls 97-92

Los Angeles Lakers - Atlanta Hawks 99-98