Öryggi farþega í Strætó

Strætó bs. hefur á undanförnum árum unnið af miklum metnaði að bættu öryggi í umferðinni. Einn liður í þessari vinnu er sérstakt forvarnarsamstarf milli Strætó og VÍS sem staðið hefur yfir frá árinu 2008. Þetta samstarf hefur skilað verulega marktækum árangri, því umferðaróhöppum og -slysum hefur fækkað um 73% á þessum tíma.

Núna standa einmitt yfir formlegir öryggisdagar Strætó og VÍS í þriðja skipti undir heitinu Öryggisdagar Strætó bs. og VÍS, þar sem meðal annars er lögð áhersla á aukið öryggi farþega í strætisvögnunum.

En hvernig geta farþegar tryggt eigið öryggi þegar þeir ferðast með strætó?

Helstu atriði sem gott er að farþegar hugi að:

n að standa ekki alveg á ystu brún gangstéttar þegar þeir bíða eftir strætisvagni á biðstöð, sérstaklega eftir að fer að kólna og hætta er á að hálkublettir myndist.

n að hafa fargjaldið tilbúið áður en komið er inn í vagninn.

n að gefa sér tíma til að framvísa kortum og skiptimiðum þannig að vagnstjóri fái tækifæri til að lesa gildistímann.

n að vera viðbúnir þegar vagninn tekur af stað.

n að forðast troðning og færa sig aftarlega í vagninn á anna- og álagstímum.

n að sýna tillitssemi og standa upp fyrir þeim sem augljóslega þurfa frekar sæti.

n að gæta vel að yngri börnum, bæði á leið inn og út úr vagninum.

n að vera ávallt viðbúnir þegar vagninn nemur staðar.

Öll þessi atriði auka öryggi farþega og gera ferðirnar ánægjulegri og skilvirkari.

Óhappa- og slysatíðni hjá Strætó bs. er hlutfallslega mjög lág miðað við almenn óhöpp og slys í umferðinni. Að ferðast með strætó er því öruggari og þægilegri leið til að fara til og frá vinnu eða skóla, eða bara skreppa í heimsóknir. Að auki er það miklu ódýrara og minna mengandi ferðamáti.

Strætó bs. hefur stöðugt unnið að bættu aðgengi á biðstöðum. Undanfarið hefur verið gert verulegt átak í þeim efnum en þetta er þó nokkuð stórt verkefni og eftir er að lagfæra og endurbæta víða.

Við vagnstjórar hjá Strætó bs. reynum að leggja okkar af mörkum til þess að auka öryggi farþega okkar. Það er hlutverk okkar að hafa farþega Strætó í fyrirrúmi og að þeir komist heilir og sáttir á áfangastað.

Góða og örugga ferð með Strætó!