Stórafmæli Tom Cruise á Íslandi

Tom Cruise er væntanlegur til landsins í júní með tökuliði stórmyndarinnar Oblivion. Þetta staðfesti Leifur B. Dagfinnsson, framleiðandi hjá framleiðslufyrirtækinu True North, í frétt á vef RÚV í gær.

Tom Cruise verður fimmtugur 3. júlí næstkomandi og hyggst samkvæmt heimildum Fréttablaðsins halda upp á afmælið á Íslandi. Sömu heimildir herma að vinum Cruise og eiginkonu hans, leikkonunnar Katie Holmes, verði boðið í veisluna. Í þeim hópi eru m.a. hjónin David og Victoria Beckham og Will og Jada Pinkett-Smith.

True North heldur utan um tökulið Oblivion hér á landi, en tökur fara að mestu fram uppi á hálendi. Tom Cruise talaði um væntanlegt stórafmæli í viðtali í bandaríska sjónvarpsþættinum Extra í desember á síðasta ári. Þar sagðist hann staðráðinn í að halda upp á áfangann þrátt fyrir að þurfa eflaust að vinna á afmælisdaginn. „Við höldum upp á þetta einhvers staðar, þó að ég verði eflaust við tökur á afmælisdaginn," sagði hann.

Ekki náðist í Leif hjá True North við vinnslu fréttarinnar. - afb