Brasilískur bakvörður til Boston Celtics

Brasilíski bakvörðurinn Leandro Barbosa hefur gert eins árs samning við Boston Celtics og mun því spila með liðinu í NBA-deildinni í vetur. Barbosa er ætlað að koma inn af bekknum.

Barbosa lék bæði með Toronto Raptors og Indiana Pacers á síðasta tímabili en stærsta hluta NBA-ferilsins síns spilaði hann við hlið Steve Nash í Phoenix Suns.

Avery Bradley er að koma til baka eftir axlaraðgerð og verður ekkert með Boston fyrir áramót. Liðið mun því treysta mikið á Barbosa fram að því en hann mun væntanlega leysa Jason Terry af.

Leandro Barbosa er orðinn 29 ára gamall og er að fara hefja sitt tíunda NBA-tímabil. Hann hefur skorað 12,5 stig og gefið 2,4 stoðsendingar að meðaltali í 588 NBA-leikjum og 39 prósent þriggja stiga skota hans hafa ratað rétta leið.

Besta tímabil Barbosa var 2006-07 þegar hann var með 18,1 stig og 4,0 stoðsendingar að meðaltali og hitti úr 43,4 prósent þriggja stiga skota sinna. Hann var valinn besti sjötti leikmaður deildarinnar það tímabil.