Hart: Hefði getað endað 10-10

Joe Hart, markvörður Manchester City, átti stórleik þegar að lið hans gerði 1-1 jafntefli við Dortmund í Meistaradeild Evrópu í kvöld.

Hart varði oft glæsilega í leiknum en varð svo að játa sig sigraðan þegar að Marco Reus skoraði fyrir Dortmund á 61. mínútu.

En Mario Balotelli jafnaði metin fyrir City með marki úr vítaspyrnu þegar lítið var til leiksloka.

„Við verðum að vera ánægðir með þetta stig. Þetta hefði getað endað 10-10 í kvöld," sagði Hart. „En það er alveg ljóst að Mario væri að fara að skora úr þessu víti. Ég veit ekki hvort þetta var réttur dómur."

City er nú með eitt stig að loknum tveimur leikjum í þessum erfiða riðli en Ajax og Real Madrid eru einnig í riðlinum. „Við héldum vonum okkar á lífi með þessu jafntefli en mér fannst Dortmund vera í allt öðrum klassa en við í kvöld."