Mourinho: Tímaspursmál hvenær Man. City vinnur Meistaradeildina

Jose Mourinho, þjálfari Real Madrid, hefur mikla trú á verkefni Man. City sem hann líkir við uppbyggingu Chelsea er hann stýrði félaginu og fékk mikinn fjárhagslegan styrk frá eigandanum, Roman Abramovich.

Mourinho hefur trú á því að Man. City geti unnið Meistaradeildina á næstu árum með sama áframhaldi.

"Þetta er ekkert ósvipað og það var hjá Chelsea. Chelsea vann hina og þessa bikara og að lokum Meistaradeildina," sagði Mourinho.

"Félagið er búið að eyða miklum peningum og kaupa góða leikmenn. Mancini hefur síðan staðið sig mjög vel og búið til góðan hóp. Ég held að á endanum muni félagið vinna stóra titilinn."

Liðin mætast í Meistaradeildinni klukkan 18.45 í kvöld og er leikurinn í beinni á Stöð 2 Sport.