Sjötti leikur Heat og Celtics jafnaði áhorfsmet - oddaleikurinn í kvöld

Miami Heat og Boston Celtics mætast í kvöld í sjöunda leik í úrslitum Austurdeildar NBA-deildarinnar í körfubolta og sigurvegari leiksins tryggir sér sæti í lokaúrslitunum á móti Oklahoma City Thunder. Leikurinn hefst klukkan hálf eitt og er í beinni útsendingu á Stöð 2 Sport.

Heimasíða NBA-deildarinni segir frá því að það hafi verið jafnað áhorfsmet á NBA-leik á kapalstöð þegar Miami jafnaði einvígið með sigri í sjötta leiknum í Boston á fimmtudaginn. Leikurinn var sýndur á ESPN-sjónvarpsstöðinni og það er 40 prósent meira áhorf á einvígi Heat og Celtics í ár en úrslitaeinvígi Vesturdeildarinnar í fyrra.

Miami Heat kom til baka í síðasta leik ekki síst vegna frábærrar spilamennsku hjá LeBron James (45 stig, 15 fráköst og 5 stoðsendingar) en í kvöld verður spennandi að sjá hvort "gömlu" karlarnir í Boston ætli ekki að eiga síðasta orðið í einvíginu.