Spurs óstöðvandi | Leiðir einvígið gegn Oklahoma 2-0

Það er ekkert lát á góðu gengi San Antonio Spurs en liðið vann í nótt sinn 20. leik í röð og náði um leið 2-0 forystu í einvígi sínu gegn Oklahoma Thunder í úrslitum Vesturdeildar NBA. Lokatölur í nótt 120-111.

Oklahoma spilaði mjög vel í nótt en leikmenn Spurs voru einfaldlega ótrúlegir og virtust ekki geta gert neitt rangt. Þeir voru með 55 prósent skotnýtingu.

Tony Parker fór fyrir sínu liði með 34 stig en hann hitti úr 16 af 21 skoti sínu.

Lykilmenn Oklahoma skiluðu allir sínu. Kevin Durant skoraði 31 stig, James Harden 30 og Russell Westbrook 27. Það einfaldlega dugði ekki til gegn ótrúlegu liði Spurs.

Serían fer nú yfir til Oklahoma og þar verða heimamenn að binda strax enda á sigurgöngu Spurs ef þeir ætla sér að eiga möguleika á því að komast í úrslit deildarinnar.