Heimsfriðurinn fékk sjö leikja bann | 45 milljóna kr. olnbogaskot

Metta World Peace leikmaður LA Lakers var í gær úrskurðaður í sjö leikja keppnisbann af NBA deildinni. „Heimsfriður" sem áður bar nafnið Ron Artest sló Jason Harden leikmann Oklahoma af miklu afli með olnboganum í leik sem fram fór s.l. sunnudag. Framherjinn Metta World Peace mun því missa af flestum leikjum LA Lakers í fyrstu umferð úrslitakeppninnar.

Metta World Peace gaf þá skýringu að atvikið hafi ekki verið viljandi en myndbandsupptökur af högginu gera það að verkum að sú skýring er ekki sannfærandi. Lakers mun ekki greiða leikmanninum laun á þeim tíma sem hann tekur út leikbannið og verður hann af um 45 milljónum kr. á þessum tíma.