Heynckes: Töfrum líkast

Jupp Heynckes, gamalreyndi þjálfari Bayern München, var í skýjunum eftir að hans menn tryggðu sér í kvöld sæti í úrslitaleik Meistaradeildar Evrópu.

Bayern hafði betur gegn Real Madrid í undanúrslitarimmunni en vítaspyrnukeppni þurfti til að knýja fram úrslit. Leikur liðanna í Madríd í kvöld var æsispennandi og bauð upp á flest það sem knattspyrnuíþróttin hefur upp á að bjóða.

„Þetta var töfrum líkast í kvöld," sagði hann. „Við lentum í miklum erfiðleikum fyrstu fimmtán mínútur leiksins en eftir það spiluðum við á löngum köflum frábæra knattspyrnu."

„Ég er sérstaklega ánægður fyrir hönd leikmanna minan og þá sem eru í forsvari fyrir félagið."

Einn þeirra síðastnefndu, Karl-Heinz Rummenigge, tók í svipaðan streng. „Við erum ótrúlega ánægðir og ótrúlega stoltir líka. Leikmennirnir eiga mikið hrós skilið en þetta var knattspyrna í allra hæsta gæaflokki."