Zlatan: Seinna vítið eyðilagði leikinn

Zlatan Ibrahimovic, sóknarmaður AC Milan, var ekki ánægður með dómgæsluna í leik sinna manna gegn Barcelona í Meistaradeild Evrópu í kvöld. Börsungar unnu 3-1 sigur en fengu tvær vítaspyrnur í fyrri hálfleik. Sigurinn tryggði Barcelona sæti í undanúrslitum keppninnar.

Lionel Messi skoraði úr þeim báðum en Barcelona fékk seinni vítið undir lok fyrri hálfleiks er staðan var 1-1. Þau úrslit hefðu dugað AC Milan til að komast áfram í undanúrslitin.

„Við náðum að jafna leikinn í 1-1 og þá fengum við víti á okkur sem ég skil ekki hvernig var hægt að dæma," sagði Zlatan við fjömliðla eftir leikinn. „Boltinn er hvergi nærri og hann dæmir víti. Það var skrýtið og mér fannst þetta eyðileggja leikinn."

„Ég hefði svo átt að fá víti í seinni hálfleik. Fyrst þeir fengu víti finnst mér að við hefðum átt að fá víti líka. Þá hefðum við komist aftur inn í leikinn."

Jose Mourinho, stjóri Real Madrid, hefur oft gagnrýnt dómara fyrir að vera hliðhollir Barcelona. Zlatan segist skilja hann vel. „Maður veltir fyrir sér hvort þeir þurfi virkilega á þessu að halda. Þetta er besta lið heims. Ég skil Mourinho vel."

„Þetta er besta liðið. En þeir eiga ekki að vera með dómarana á sínu bandi líka. Ef dómgæslan hefði verið hlutlaus hér í kvöld hefðum við átt betri möguleika á að komast áfram."

„En þeir voru góðir og getum við ekki skellt allri skuldinni á dómarann. Við vorum að spila við gott lið og þeir gerðu okkur lífið erfitt."