Ramires: Allt Roberto Di Matteo að þakka

Ramires, miðjumaður Chelsea segir að uppkoma liðsins að undanförnu sé nýja stjóranum Roberto Di Matteo að þakka en hann tók við liðinu þegar André Villas-Boas var rekinn eftir aðeins átta mánuði í starfi.

Chelsea er búið að leika átta leiki undir stjórn Roberto Di Matteo og hefur unnið sex þeirra. Liðið á möguleika á því að komast í undanúrslit Meistaradeildarinnar í kvöld þegar liðið tekur á móti Benfica í seinni leik liðanna í átta liða úrslitum. Chelsea vann fyrri leikinn 1-0.

„Við fórum augljóslega í gegnum mjög erfitt tímabil en við höfum grætt á stjórabreytingunni. Við höfum fundið sjálfstraustið aftur og berum nú meiri virðingu fyrir okkur sjálfum," sagði Ramires.

„Roberto hefur komið inn með nýjar hugmyndir og hlaðið í okkur sjálfstrausti. Það er erfitt að útskýra nákvæmlega hverju hann hefur breytt en við erum farnir að átta okkur betur á því að við erum með frábært lið með frábærum leikmönnum. Við byggðum strax ofan á sigurinn í fyrsta leiknum hans á móti Birmingham City og höfum síðan styrkst með hverjum leik," sagði Ramires.