Salomon Kalou tryggði Chelsea sigur í Portúgal

Chelsea er í fínum málum eftir 1-0 útisigur á portúgalska liðinu Bendica í fyrri leik liðanna í átta liða úrslitum Meistaradeildarinnar en spilað var á heimavelli Portúgal. Chelsea fer bæði með sigur og útivallarmark heim til Englands. Þetta var fyrsti útisigur Chelsea í Meistaradeildinni á tímabilinu.

Salomon Kalou og Fernando Torres voru óvænt í byrjunarliði Roberto Di Matteo og þökkuðu traustið með því að búa til sigurmarkið fimmtán mínútum fyrir leikslok.

Chelsea hafði nokkrum sinnum heppnina með sér fram að markinu en eftir þessi úrslit er ljóst að róðurinn verður þungur hjá portúgalska liðinu í seinni leiknum.

Benfica-maðurinn Oscar Cardozo fékk fyrsta alvöru færi leiksins á 20. mínútu en skaut framhjá eftir að hafa fengið að taka boltann niður í teignum. Fyrri hálfleikurinn var annars rólegur en það var mun meira fjör í þeim seinni.

David Luiz bjargaði á marklínu frá Cardozo á 47. mínútu og Benfica-liðið byrjaði seinni hálfleikinn mjög vel.

John Terry var heppinn að fá ekki á sig víti á 61. mínútu og í næstu sókn slapp Juan Mata í gegn en skaut í stöngina úr þröngu færi eftir að hafa leikið á markvörðinn.

Cardozo var ekki hættur því Petr Cech varði mjög vel skalla frá á honum á 67. mínútu.

Salomon Kalou kom Chelsea síðan í 1-0 á 75. mínútu með skoti úr markteignum eftir frábæran undirbúning frá Fernando Torres.

Þannig urðu lokatölurnar og Chelsea á mjög góða möguleika á því að komast í undanúrslitin.