Hilmar Örn kastaði vel í Svíþjóð

Hilmar Örn Jónsson, frjálsíþróttamaðurinn efnilegi úr ÍR, stóð sig vel á móti í Vaxjö í Svíþjóð um helgina. Hilmar Örn hafnaði í 4. sæti í kringlukasti í dag og 2. sæti í kúluvarpi í gær.

Hilmar Örn, sem er á sextánda aldursári, kastaði kringlunni 41,24 metra sem er hans besti árangur með 1,5 kg kringlu. Í gær flaug kúlan 16,13 metra en hann á best 16,28 metra með 5 kg kúlu.

Það er afreksþjálfarinn Vésteinn Hafsteinsson sem hefur veg og vanda af mótinu í Svíþjóð.

Nánar er fjallað um árangur Hilmars á heimasíðu ÍR. Sjá hér.