Terry og Lampard: Sönnuðum að við erum lið í kvöld

John Terry, fyrirliði Chelsea, er nýkominn aftur eftir meiðsli og hann steig heldur betur upp í kvöld er Chelsea sló Napoli úr Meistaradeildinni í framlengdum leik.

"Þetta var eitt af okkar bestu kvöldum. Í kvöld sýndum við hvað Chelsea snýst um og er. Við vorum traustir, sterkir og börðumst allt til enda," sagði Terry. "Við sönnuðum að við erum lið í kvöld. Það stóðu allir saman þegar allt var undir."

Frank Lampard skoraði rétt eins og Terry. Tók víti undir pressu og afgreiddi það með stæl.

"Þetta var risastór sigur fyrir okkur. Það var nauðsynlegt að við sönnuðum að við ættum erindi í þessa keppni. Við getum byggt ofan á þennan sigur og vonandi verður framhald á þessum góða leik," sagði Lampard.