NBA í nótt: Kobe góður með grímuna | Lin öflugur í sigri

Kobe Bryant skoraði 31 stig er LA Lakers vann góðan sigur á Minnesota Timberwolves, 104-85, í NBA-deildinni nótt. Bryant spilaði með grímu í leiknum þar sem hann nefbrotnaði í stjörnuleiknum um helgina.

Kobe var nálægt því að ná þrefaldri tvennu en hann tók átta fráköst og gaf sjö stoðsendingar. Var þetta sautjándi sigur Lakers á Minnesota í röð.

Dwayne Wade, leikmaður Miami, nefbraut Bryant í stjörnuleiknum og gaf honum heilahristing þar að auki. Þó var um óviljaverk að ræða enda baðst Wade margoft afsökunar.

Það virtist ekki koma að sök þó svo að Bryant hafi verið með grímu enda nýtti hann níu af tíu vítaskotum sínum í leiknum. Pau Gasol kom næstur með fimmtán stig og Andrew Bynum var með þrettán stig og þrettán fráköst.

Kevin Love spilaði ekki með Minnesota þar sem hann er veikur. Michael Beasley og Martell Webster skoruðu fjórtán stig hvor.

Jeremy Lin var með nítján stig og þrettán stoðsendingar þegar að New York Knicks hafði betur gegn Cleveland, 120-103. Carmelo Anthony var þó stigahæstur leikmaður Knicks með 22 stig.

New York spilaði reyndar skelfilega í fyrri hálfleik en gekk betur þegar varamenn fengu meira að spila í síðari hálfleiknum. New York vann seinni hálfleikinn með 71 stigi gegn 42.

Oklahoma City vann Philadelphia, 92-88, og þar með sinn sjötta leik í röð þrátt fyrir að hafa verið sjö stigum undir í fjórða leikhluta. Kevin Durant skoraði átta stig á lokakafla leiksins og alls 23 í leiknum.

Úrslit næturinnar:

Philadelphia - Oklahoma City 88-92

Orlando - Washington 95-102

Boston - Milwaukee 102-96

New York - Cleveland 120-103

Atlanta - Golden State 82-85

Detroit - Charlotte 109-94

Memphis - Dallas 96-85

New Orleans - Toronto 84-95

San Antonio - Chicago 89-96

Denver - Portland 104-95

Utah - Houston 104-83

LA Lakers - Minnesota 104-85