Kidd: Við njótum ekki nægrar virðingar

Jason Kidd, leikstjórnandi NBA-meistara Dallas Mavericks, segir að liðið hafi ekki fengið neitt ókeypis frá dómurum deildarinnar í vetur og að þeir líti ekki á liðið sem meistara.

Nokkrir vafasamir dómar hafa farið gegn Mavs í vetur sem þeir eru allt annað en sáttir við. Nú síðast í leiknum gegn Oklahoma í nótt sem Dallas tapaði naumlega.

"Við fáum aldrei að njóta vafans. Mér finnst ekki að það sé litið á okkur sem meistarana en það er reyndar allt önnur saga," sagði Kidd pirraður.

Vafasöm villa var dæmd á Mavs undir lokin í nótt og svo var ekki dæmt á klárt brot á Dirk Nowitzki. Þessir tveir dómar urðu þess valdandi að Dallas átti ekki möguleika á að vinna leikinn.