Szczesny: AC Milan refsaði okkur í öllum mörkunum

Wojciech Szczesny, markvörður Arsenal, fékk á sig fjögur mörk þegar Arsenal steinlá 4-0 á móti AC Milan í fyrri leik liðanna í sextán liða úrslitum Meistaradeildarinnar í kvöld.

„Við áttum ekki okkar besta leik en AC Milan liðið refsaði okkur í öllum mörkunum. Þeir eiga hrós skilið fyrir það," sagði Wojciech Szczesny eftir leikinn.

„Þeir voru betra liðið í þessum leik enda með marga af bestu sóknarmönnunum í heimi. Það er erfitt að spila á móti Ibrahimovic sem er einn besti framherji sem ég hef spilað á móti," sagði Szczesny.

„Við verðum bara að halda áfram að berjast og núna verðum við að endurheimta sjálfstraustið okkar sem fyrst. Þessi leikur var mikil vonbrigði en við þurfum að lifa í voninni og reyna að gera eitthvað í seinni leiknum," sagði Szczesny.